У Брэсцкім дзяржаўным тэхнічным універсітэце завяршылася ўнікальнае прафарыентацыйнае мерапрыемства «Канікулы ў БрДТУ». На працягу пяці насычаных дзён старшакласнікі з розных школ горада і вобласці атрымалі магчымасць не толькі пазнаёміцца з універсітэтам, але і пагрузіцца ў атмасферу кожнага факультэта.
Кожны дзень быў прысвечаны аднаму з факультэтаў універсітэта. Школьнікам далі ўнікальную магчымасць наведаць лекцыі, майстар-класы і практычныя заняткі, якія дазволілі ім лепш зразумець спецыфіку розных напрамкаў падрыхтоўкі.
Першы дзень прайшоў пад эгідай факультэта інжынерных сістэм і экалогіі. Старшакласнікаў пазнаёмілі з сучаснымі тэндэнцыямі ў энергетыцы, паказалі працу сучаснага абсталявання. Асаблівую цікавасць выклікалі майстар-класы: у лабараторыі інжынернай экалогіі і хіміі, па вырабе свечак, па аквагрыме.
Другі дзень прысвяцілі эканамічнаму факультэту. Школьнікі прынялі ўдзел у тэматычных лекцыях, інтэрактывах, майстар-класах, арганізаваных кафедрамі факультэта. Самым запамінальным для будучых абітурыентаў стаў квіз «Будзь першым!» , у рамках якога рабяты змаглі прымерыць на сябе розныя напрамкі эканамічнай работы.
На трэці дзень школьнікаў запрасілі на факультэт электронна-інфармацыйных сістэм, дзе яны пазнаёміліся з асновамі праграмавання, стварэння мабільных дадаткаў і кібербяспекі. Практычныя заданні дапамаглі дзецям асвоіць базавыя навыкі працы з кампутарнымі праграмамі. Таксама рабяты паўдзельнічалі ў квэсце «Аптымальная канфігурацыя ПК» і пагутарылі са студэнтамі факультэта.
Чацвёрты дзень быў асабліва цікавым для тых, хто цікавіцца тэхнікай. На машынабудаўнічым факультэце рабяты змаглі ўбачыць прынцып дзеяння розных машын, маніпулятараў, працу лабараторнага і навуковага абсталявання. На працягу ўсяго экскурсійнага маршруту рабят суправаджалі студэнты факультэта, распавядаючы пра перавагі навучання, адказваючы на пытанні, якія ўзнікаюць па ходзе правядзення мерапрыемства. Акрамя таго, найбольш актыўныя дзеці паўдзельнічалі ў віктарынах і атрымалі памятныя падарункі.
Завяршальны пяты дзень быў цалкам прысвечаны архітэктурна-будаўнічаму факультэту. Выкладчыкі і студэнты старэйшых курсаў на інтэрактыўных пляцоўках распавялі будучым абітурыентам пра асаблівасці падрыхтоўкі спецыялістаў будаўнічай галіны. У праграму ўвайшлі майстар-класы па архітэктуры і дызайне, экскурсіі па ўніверсітэце і лабараторыях, а таксама цікавыя лекцыі і практычныя заняткі.
Мерапрыемства выклікала масу станоўчых водгукаў ад яго ўдзельнікаў. Многія школьнікі адзначылі, што дзякуючы «Канікулам ў БрДТУ» ў іх з'явілася больш выразная карціна таго, чым займаюцца студэнты на кожным з факультэтаў. Некаторыя ўдзельнікі ўжо вызначыліся з выбарам будучай прафесіі, іншыя ж вырашылі глыбей вывучыць напрамкі, якія цікавяць іх.
За тры гады «Канікулы ў БрДТУ» сталі штогадовай традыцыяй. Гэта дазваляе ўсё большай колькасці школьнікаў даведацца больш аб магчымасцях атрымання вышэйшай адукацыі ў БрДТУ і выбраць прафесію сваёй мары!
